എന്‍റെ കൂട്ടുകാര്‍

Friday, December 13, 2013

ഓക്‌സി റിച്ച്

അവള്‍ സുന്ദരിക്കോതയാണ്
എന്നാലും എന്നെപ്പോലെതന്നെ;
ശ്വസിക്കുന്നത് ഓക്‌സിജനും
പുറത്ത് വിടുന്നത്
കാര്‍ബണ്‍ ഡയോക്‌സൈഡും.

കാര്‍ബണ്‍ ശ്വസിച്ച്
ഓക്‌സിജന്‍ പുറത്തുവിട്ടിരുന്നേല്‍
ചന്തമിത്തിരി കുറഞ്ഞാലും വേണ്ടില്ല
അവളെ ഞാന്‍ കെട്ടിയേനെ.

കുടുംബാന്തരീക്ഷം
മലിനമാകരുതല്ലൊ....

എനിക്കിത്തിരി
നല്ല ശ്വാസംതിന്നു ജീവിക്കണമല്ലോ...

Thursday, May 23, 2013

ജീര്‍ണ്ണ സന്യാസികള്‍

ട്രാക്കില്‍ നിന്ന്
ഉടല്‍പ്പൊളികള്‍
പെറുക്കിക്കൂട്ടുന്നവനോട്
മരിച്ചവനേ....നിങ്ങള്‍
നമസ്‌ക്കരിക്കണം.

അറ്റതല വേറെ.
തുടയ്ക്കുതാഴെ
കഷ്ണിച്ച കാലുകള്‍ വെവ്വേറെ.
ചക്രങ്ങളീര്‍ച്ചിച്ചുകൂട്ടിയ
ചോര, മാംസ്യപ്പൂക്കള്‍,
തലയും കാലുമില്ലാതെ
വെട്ടിയിട്ട തെങ്ങുതടിപോലെ
തൊലിയുരിഞ്ഞെല്ലുവെളിവായ
നിന്റെയസ്തികൂടാരം,
ഓരോന്നോരാന്നായി
പെറുക്കിയെടുക്കുമ്പോള്‍
നോക്കിനില്‍ക്കുന്നവര്‍
കൈയ്യിലെ ഒറ്റക്കണ്ണുകള്‍ മിന്നിക്കുന്നു.
ചിലര്‍ രണ്ടുകണ്ണും പൊത്തുന്നു.
ചിലര്‍ തലചുറ്റി വീഴുന്നു .

ചോരയിലുച്ചവെയില്‍മൂത്തു പൊള്ളിയ
ഉടല്‍പ്പൊളി പെറുക്കുന്നവനേ....
ചോരകണ്ട് നിന്റയറപ്പുമാറണേ...

വാറ്റ് ചാരായമൊഴിച്ച്
പണ്ട് കുടിച്ച
മുലപ്പാലിന്റെയോര്‍മ്മകള്‍ക്ക്
തീകൊടുക്കണേ...

തമ്പാക്കില്‍ ചുണ്ണാമ്പുകൂട്ടി
നാവഴുകിയ വായില്‍ നിന്ന്
ചുടലയുടെ ചുടുകാറ്റു പൊന്തണേ...

പുണ്ണുപൊത്തിയ യോനികള്‍ തുരന്ന്
മുള്ളുകൊള്ളാതെ നീ നിന്റെ രേതസ്സൊടുക്കണേ..

ജീര്‍ണ്ണതകളെ
പ്രകീര്‍ണ്ണനം ചെയ്ത്
ഒരോന്നിലും മുങ്ങി
ഉടലും മനസ്സും ജീര്‍ണ്ണ ശവമാക്കി
ധ്യാനിച്ചു പഠിക്കണേ...

വീണ്ടുവിചാരമില്ലാതെ
ലോകത്തിന്നീര്‍ച്ചവേഗങ്ങളില്‍
വീണു ചിതറി മരിച്ചവരേ....
മരിക്കുന്നവരേ....
മരിക്കാനിരിക്കുന്നവരെ....
നിങ്ങളെ പെറുക്കിയെടുക്കുവാന്‍
വരുന്നു
നാനാ 'ചേരി' യില്‍ നിന്നിതാ
ജീര്‍ണ്ണ സന്യാസികള്‍.

Thursday, May 16, 2013

മീംമ്മുള്ള്

മീന്തിന്നുമ്പൊ
മീംമ്മുള്ളും തിന്നണം.
തിന്ന് നോക്ക്...
നല്ല സ്വാദാണ്...

തൊണ്ണേല് കൊള്ളാണ്ട്
തൊണ്ടേല് തറയാണ്ട്
മുള്ളായ മുള്ളോരോന്ന്
പല്ലോണ്ട് നറും നുറാന്ന്
ചവച്ച്.....പൊടിച്ച്
മഌര്‍ര്‍...ന്ന് വിഴുങ്ങണം

അതോടെ തീരും
കടലിന്റെ,
കുടുങ്ങിക്കിടന്ന വലക്കടെ,
മീംമ്മാര്‍ക്കറ്റിന്റെ,
മ്മ്‌ടെ ചട്ടീല് വേവേറ്റ് കെടക്കുമ്പഴും
മ്മ്‌ടെനേരെ നീട്ടിയ
അവള്‌ടെ
ഒടുക്കത്തെ
മീംമ്മുള്ളിന്റെ,
മീന്‍വാണിഭ കഥ.



(പ്രവാസി ശബ്ദം വിഷുപതിപ്പ് 2013)

Related Posts Plugin for WordPress, Blogger...